Një ngjarje e rëndë kriminale ka ndodhur mbrëmjen e kaluar në qytetin e Durrësit, ku 36-vjeçari Arbër Goreja është plagosur me armë zjarri. Policia ka identifikuar autorin e dyshuar si Erkid Kazazi, 30 vjeç, i cili tashmë është shpallur në kërkim.

Ngjarja ka ndodhur në zonën mes Shënavlashit dhe Fllakës, ku Goreja ka deklaruar se ishte duke udhëtuar me mjetin e tij kur është ndjekur nga një makinë tip “Ford”, e cila ka ndaluar paralelisht dhe nga ku është hapur zjarr ndaj tij. Ai pretendon se është qëlluar tre herë, duke marrë një plagë në zonën e brinjëve.

Pavarësisht plagosjes, Goreja ka arritur të shkojë vetë deri te Komisariati i Policisë së Durrësit, ku ka kërkuar ndihmë dhe më pas është transportuar për në spital. Burime nga spitali bëjnë me dije se gjendja e tij është jashtë rrezikut për jetën.

Autori i dyshuar, Erkid Kazazi, rezulton të jetë një emër i njohur për strukturat e rendit, me precedentë të mëparshëm penalë. Policia e Durrësit ka vijuar kërkimet intensive në terren dhe ka vendosur pika kontrolli për kapjen e tij.

Ndërkohë, grupi hetimor po punon për zbardhjen e plotë të rrethanave dhe motivit të kësaj ngjarjeje të rëndë. Paraprakisht dyshohet se mes palëve ka patur një konflikt të mëparshëm, por pista e hetimit mbetet e hapur.