Reshjet e dendura të shiut që ranë në orët e para të mëngjesit kanë shkaktuar vështirësi në disa zona të Durrësit, duke e bërë të vështirë qarkullimin në disa prej kryqëzimeve kryesore të qytetit.

Më problematike paraqitet situata për këmbësorët, të cilët janë detyruar të ecin në rrugë të mbushura me ujë për të shkuar në punë apo në shkollë. Në disa akse, niveli i ujit është rritur ndjeshëm për shkak të pamundësisë së sistemit kullues për të përthithur sasinë e reshjeve.

Sipas parashikimeve meteorologjike, reshjet me intensitet të ulët pritet të vazhdojnë gjatë gjithë ditës, duke përfshirë pjesën më të madhe të vendit. Autoritetet lokale u bëjnë thirrje qytetarëve të tregojnë kujdes në qarkullim dhe të shmangin zonat e përmbytura.