Në hapjen e fushatës elektorale të Partisë Socialiste për zgjedhjet e 11 majit, Durrësi u prezantua me një performancë të veçantë muzikore, duke interpretuar këngën italiane “Sarà perché ti amo”. Performanca artistike solli një atmosferë të ngrohtë dhe festive në mesin e mbështetësve të PS-së, ndërsa drejtuesja e qarkut të Durrësit, Emirjana Sako, theksoi angazhimin e partisë për të siguruar fitoren në këtë qark.

Në fjalën e saj, Sako shprehu besimin e fortë se PS do ta mbyllë garën në Durrës me të paktën 9 mandate. Ajo theksoi se për këtë vit, PS synon të fitonte një mandat më shumë krahasuar me zgjedhjet e kaluara, duke përfshirë të rinjtë dhe të moshuarit në mbështetje të partisë.

“Gjej momentin të përshëndes emigrantët që na ndjekin nga rrethët, qytetarë të Shijakut, Durrësit dhe krijues që do i kemi mbështetje të jashtëzakonshme më datë 11. Hyjmë në këtë garë si fitues me 8 deputetë, do ta përfundojmë garën të paktën me 9 deputetë,” tha Sako, duke theksuar se partia do të bëjë çmos për të siguruar vota nga të gjitha grupet e shoqërisë.

Sako përmendi gjithashtu që vota e 11 majit do të bashkojë të rinjtë dhe të moshuarit për të mbështetur PS-në, duke shprehur optimizëm për një rezultat të fuqishëm në këtë qark.