Dy anëtarë të Gardës Kombëtare të SHBA-së kanë ndërruar jetë pasi u plagosën në një shkëmbim zjarri vetëm një bllok larg Shtëpisë së Bardhë, në qendër të Uashingtonit. Policia ka arrestuar një të dyshuar, i cili aktualisht po merret në pyetje për zbardhjen e motivit të sulmit.

Sipas informacioneve të para nga Policia Metropolitane dhe mediat amerikane, dy pjesëtarët e Gardës hapën zjarr ndaj sulmuesit përpara se të goditeshin fatalisht. Ende nuk është e qartë nëse ata ishin shënjestra direkte apo ndërhynë për të parandaluar një situatë të përshkallëzuar me armë.

Ngjarja ndodhi në kryqëzimin e Rrugës së 17-të me Rrugën H NW, një zonë tepër e frekuentuar dhe vetëm pak qindra metra nga ndërtesa presidenciale. Forca të shumta të policisë kanë rrethuar perimetrin, ndërsa automjete emergjence mbërritën menjëherë në vendngjarje.

Presidenti Donald Trump reagoi menjëherë përmes rrjetit social Truth, ku shprehu mbështetjen e tij për Gardën Kombëtare dhe forcat e zbatimit të ligjit. Shtëpia e Bardhë ka bërë të ditur se Presidenti është informuar vazhdimisht mbi zhvillimet dhe situata po monitorohet nga afër.

Për arsye sigurie, pjesë të Aeroportit Ndërkombëtar Ronald Reagan janë pezulluar dhe fluturimet që niseshin nga ky aeroport janë ndaluar përkohësisht.

Hetimet mbi motivet e sulmit vijojnë në dinamikë, ndërsa autoritetet pritet të publikojnë detaje të reja gjatë orëve në vijim.