Dy elektriçistë të OSHEE-së në Memaliaj të cilët kishin shkuar për të riparuar linjën elektrike në një shtyllë tensioni kanë rënë në kontakt me rrymën dhe për pasojë njëri prej tyre është plagosur rëndë.

Policia bën me dije se i dëmtuar rëndë ka mbetur shtetasi me inicialet A.M., 54-vjeç, ndërkohë që dëmtime të lehta ka marrë kolegu i tij A.H., 55-vjeç.

Grupi hetimor dhe policia ndodhen në vendngjarje dhe po punojnë për zbardhjen e rrethanave të ngjarjes.

Memaliaj/Informacion paraprak.

Rreth orës 11:00, jemi njoftuar se në fshatin Çërrilë, Memaliaj, shtetasit A. H., 55 vjeç dhe A. M., 54 vjeç banues në Çërrilë, Memaliaj (Punonjës të OSHEE), duke punuar në një shtyllë tensioni për të riparuar linjën elektrike në fshatin Çërrilë, kanë rënë në kontakt me rrymën elektrike.

Për pasojë shtetasi A. M., është dëmtuar rëndë, i cili u transportua për në spitalin Gjirokastër dhe shtetasi A. H. ka marrë dëmtime të lehta.

Grupi hetimor po kryen veprimet e mëtejshme hetimore për sqarimin e rrethanave të ngjarjes.