Kassaveti, Greqi – Dy të burgosur shqiptarë, Romeo Qosja dhe Lefter Toçi, janë arratisur mbrëmjen e djeshme nga burgu i Kassavetias në Greqi. Qosja, 41 vjeç nga Cërriku, ishte i dënuar me 20 vjet heqje lirie për vrasje, grabitje, shkatërrim prone me zjarr dhe armëmbajtje pa leje. Toçi, gjithashtu 41 vjeç dhe nga Bradasheshi i Elbasanit, ishte dënuar po me 20 vjet për pjesëmarrje në organizatë kriminale, bashkëpunim në vrasje, plagosje me pasojë vdekje, grabitje, dhe shkatërrim prone me zjarr.
Ata ishin në burgun e Kassavetias që nga viti 2019 dhe mbaheshin në një zonë të parrethuar të burgut për shkak të sjelljes së mirë. Gjatë vitit 2024, ata kishin përfituar 5 leje. Sipas hetimeve paraprake, dyshimet janë që ata kanë përfituar nga kthimi i tyre nga leja disa ditë më parë për të planifikuar arratisjen. Autoritetet janë vënë në ndjekje të tyre dhe po zhvillojnë hetime për kapjen e tyre.
