Dy turistë francezë janë shpëtuar pas një operacioni të vështirë kërkimi dhe shpëtimi, i cili zgjati rreth dy orë në Parkun Kombëtar “Shebenik–Jabllanicë”, në zonën malore të njohur si Maja e Gurit.

Sipas njoftimit zyrtar, Autoriteti i Zonave të Mbrojtura Elbasan, në bashkëpunim me banorët e zonës, arriti të lokalizojë turistët dhe më pas t’i shoqërojë deri në vendin ku po qëndronin. Fatmirësisht, ata ndodhen në gjendje të mirë shëndetësore, pavarësisht situatës së rrezikshme ku u gjendën.

Parku Kombëtar “Shebenik–Jabllanicë” është një nga thesaret natyrore të Shqipërisë, i njohur për majat e larta malore, pyjet e dendura dhe biodiversitetin unik. Ky destinacion frekuentohet gjithnjë e më shumë nga turistë vendas dhe të huaj, por terrieni i vështirë dhe mungesa e orientimit shpeshherë krijojnë situata të rrezikshme.

Autoritetet u bëjnë apel vizitorëve që eksplorojnë zonën të kenë kujdes, të përdorin guida lokale dhe mjete orientimi, për të shmangur incidente të tilla.