Një plagosje me thikë është raportuar në Durrës, ku dy vëllezër kanë plagosur një 32-vjeçar pas një konflikti të çastit. Sipas njoftimit të policisë, ngjarja ka ndodhur rreth orës 18:45 në lagjen nr. 4, ku shtetasit E.G., 36 vjeç dhe I.G., 33 vjeç, dyshohet se për motive të dobëta, plagosën me mjet prerës shtetasin G.B., 32 vjeç.

Menjëherë pas ngjarjes, shërbimet e Policisë ndërhynë me shpejtësi, duke mundësuar kapjen dhe shoqërimin e autorëve të dyshuar. 32-vjeçari u transportua në spitalin e Durrësit, ku po merr ndihmën mjekësore dhe ndodhet jashtë rrezikut për jetën.

Grupi hetimor, nën drejtimin e Prokurorisë, ka nisur hetimet për sqarimin e plotë të rrethanave të ngjarjes.