Pas raportimeve mediatike se mbi 70 fëmijë në një kopsht shtetëror në Gramsh kanë kërkuar ndihmë mjekësore për shkak të dyshimeve për helmim nga ushqimi, ka ardhur reagimi zyrtar nga Njësia Vendore e Kujdesit Shëndetësor.

Sipas NJVKSH-së Gramsh, deri më tani vetëm një fëmijë është paraqitur me shqetësime të lehta gastrointestinale, i referuar nga mjekja pediatre për analiza laboratorike.

Autoritetet sqarojnë se, në kuadër të hetimit epidemiologjik, janë marrë 76 mostra nga fëmijë dhe punonjës të institucionit parashkollor dhe se analizat janë në proces verifikimi.

Hetimi po zhvillohet në bashkëpunim me strukturat përkatëse për të përcaktuar me saktësi burimin e mundshëm të infeksionit dhe për të garantuar sigurinë ushqimore dhe shëndetësore të fëmijëve.