E ardhmja e portierit Iñaki Peña te Barcelona është bërë e pasigurt pas transferimit të Wojciech Szczęsny, i cili tashmë është zgjedhja e parë mes shtyllave për ekipin katalanas. Përballë mungesës së minutave, Peña po shqyrton largimin gjatë merkatos së verës për të siguruar më shumë hapësira loje.

Sipas gazetës spanjolle “AS”, Galatasaray është klubi më i interesuar për shërbimet e tij, pasi kampionët e Turqisë po kërkojnë një zëvendësues për veteranin Fernando Muslera. Portieri uruguaian pritet të largohet nga Europa këtë verë, duke i hapur rrugë një rikthimi në vendlindje. Peña nuk është i panjohur për skuadrën turke, pasi ai ka qenë më parë në huazim te Galatasaray dhe ka lënë përshtypje pozitive.

Ndërkohë, në një tjetër zhvillim, portieri titullar i Barcelonës, Marc-André ter Stegen, ka njoftuar ndarjen nga bashkëshortja e tij, Daniela ter Stegen (Jehle), pas më shumë se një dekade së bashku. Lajmi u bë i ditur nga vetë futbollisti përmes një mesazhi në rrjetet sociale, ku ai kërkoi respekt për privatësinë e familjes në këtë periudhë të ndryshimeve.

Me situatën në repartin e portës të ndryshuar ndjeshëm, mbetet për t’u parë nëse Barcelona do të lejojë largimin e Iñaki Peñës apo nëse do ta mbajë si alternativë për të ardhmen.