Një ngjarje makabre ka tronditur qytetin Cava dei Tirreni, në Italinë jugore, ku një grua 40-vjeçare u vra brutalisht nga partneri i saj, i cili më pas i dha fund jetës.

Sipas mediave italiane, viktima është Ana Tagliaferri, pronare e një pastiçerie të njohur në zonë. Ajo u godit për vdekje me thikë të paktën tetë herë brenda banesës ku jetonte me partnerin e saj, Diego Di Domenico.

Pas krimit, autori është ngjitur në çatinë e ndërtesës dhe është hedhur në boshllëk, duke humbur jetën në vend. Shërbimet e emergjencës dhe policia mbërritën menjëherë në vendngjarje, por nuk mundën të shpëtonin asnjërin prej tyre.

Autoritetet kanë nisur hetimet për të zbardhur motivet dhe rrethanat e kësaj ngjarjeje të rëndë, ndërsa komuniteti lokal është shprehur i tronditur nga humbja e 40-vjeçares, e cila njihej si një sipërmarrëse e respektuar dhe aktive në jetën e qytetit.

Ngjarja ka rikthyer sërish në vëmendje problematikën e dhunës në familje dhe rasteve të femicidit në Itali.