E Ngarkuara me Punë e SHBA në Tiranë, Nancy VonHorn, ka marrë pjesë sot në ceremoninë e certifikimit të punonjësve të Agjencisë së Mbikëqyrjes Policore (AMP), duke theksuar pritshmëritë e larta të shqiptarëve për reformën në drejtësi. Gjatë fjalës së saj, VonHorn e cilësoi këtë reformë si “të pakthyeshme”, duke theksuar mbështetjen e fortë të Shteteve të Bashkuara për të dhe për punën e institucioneve të Shqipërisë që po angazhohen për ta realizuar.

“Pritshmëritë që publiku shqiptar ka për reformën në drejtësi dhe për punën tuaj dhe kolegëve tuaj janë shumë të larta. Dhe kjo ndodh për shkak se ju dhe kolegët tuaj tashmë keni prodhuar rezultate për ta,” u shpreh VonHorn, duke shtuar se 29 punonjës të diplomuar janë gati për të kontribuar në forcimin e ndikimit të reformës.

Diplomatja e SHBA gjithashtu përmendi bashkëpunimin e rëndësishëm mes AMP-së dhe SPAK, duke theksuar se mbështetja për këtë bashkëpunim dhe për luftën kundër korrupsionit do të vazhdojë të jetë një prioritet i Shteteve të Bashkuara. Ajo nuk e shmangu as ngjarjen e dhunshme të pak ditëve më parë në Shkodër, duke theksuar rëndësinë e vazhdimit të përpjekjeve për të garantuar rendin dhe sigurinë.

“Reforma në drejtësi është e pakthyeshme, dhe unë e them këtë sepse Shtetet e Bashkuara e besojnë atë dhe besojnë te ju,” tha VonHorn, duke u shprehur se ky angazhim do të vazhdojë të mbetet një prioritet i rëndësishëm për partnerët ndërkombëtarë.