Kryeministri Edi Rama, duke folur para emigrantëve shqiptarë, kujtoi kohët e vështira kur shqipëtarët shkonin në Itali në fillimet e demokracisë.

Sipas kryeministrit Rama, askush nuk mund ta harrojë kohën kur vendi ynë kishte damkën “e stato albanese”, e cila ishte prezente në çdo shkrim të mediave italiane.

“Fatkeqësia e madhe ishte se në të njëjtën kohë Shqipëria në sytë e Italisë dukej si një ekran televizioni kur ikën dritat. Në sytë e italianëve të viteve ’90, asgjë nuk lidhte Shqipërinë e paraluftës, kujtimi i së cilës ishte flakur në mbeturinat e historisë italiane të fashizmit me Shqipërinë komuniste, e cila nga ajo e kaluar ishte mbarsur si pjella e imponuar e një shtatzënie të mbrapsht. Kush nuk i kujton atë kohë me damkën ‘E stato un albanese’ kur zinin debatet në televizionet italiane. Ishte koha e një farë Umberto Bossi, që bëri thirrje që shqiptarët të priteshin në det me pushkën e ushtrisë. Ishte një personazh që dukej sikur kishte dalë nga një film komik”, tha Rama.