Bashkëshortja e Shefki Kurtit është vendosur në pranga si autore e dyshuar e vrasjes së 72-vjeçarit shqiptar, krim horror i ndodhur rreth një muaj më parë në Itali.

Ngjarja e rëndë u zbulua pas një inspektimi të kryer në banesën e çiftit më 8 gusht nga karabinierët ku kanë gjetur gjurmë të vrasjes.

Gjatë marrjes në pyetje gruaja e viktimës, Nadire Kurti ka bashkëpunuar me hetuesit dhe ka pranuar krimin.

Ajo rrëfeu se vrau 72-vjeçarin me sëpatë brenda shtëpisë së tyre, e copëtoi trupin në banjë dhe i vendosi pjesët në qese mbeturinash, për ti hedhur më pas në lumin “Adigetto”, disa qindra metra larg banesës së tyre.

Ajo akuzohet për veprat penale ” Vrasja e rëndë” dhe “shkatërrimi i kufomës”. Trupi i viktimës u gjet i copëtuar, i fshehur brenda disa qeseve plastike, në ujërat e lumit “Adigetto”. Ndërsa kafka e 72-vjeçarit nuk është zbuluar ende.

Ishte djali i çiftit, i cili ka dy fëmijë të rritur, që denoncoi zhdukjen e Shefki Kurit të dielën e 24 korrikut, ditën kur u raportua për një sherr mes viktimës dhe bashkëshortes së tij.