Deputeti i Partisë Demokratike, Edi Paloka, mohoi kategorikisht idenë se ndërkombëtarët mund të ndërhyjnë për të larguar kryeministrin Edi Rama, duke theksuar se përplasjet dhe zgjidhjet duhet të vijojnë nga brenda vendit.

Në një dalje televizive, Paloka theksoi se mbështetja e jashtme, përfshirë SHBA-të, nuk është faktor vendimtar për ndryshimet politike në Shqipëri. “Nëse dikush mendon se do vijnë ata nga jashtë dhe do na e zgjidhin problemin, ta harrojnë. Për mua, ndërkombëtarët, të paktën SHBA, e kanë luajtur këtë rol. Mos dëgjojmë këto përrallat e Ramës për vizitën e Ivanka Trump. Nuk ka ndryshuar asgjë me administratën e Trump”, tha Paloka.

Ai shtoi se fokus i rëndësishëm mbetet brenda vendit, duke shtuar se situata politike e kryeministrit është e ndërlikuar: “Rama është kryeministër pa urimin e SHBA-ve. Çdo javë i është kujtuar nga ambasada e SHBA, e cila kohët e fundit ka folur hapur për çështjet e vendit, përfshirë fenomenin e narkoshtetit dhe ikjen e qytetarëve. Qëndrimi i SHBA është i qartë.”

Paloka gjithashtu theksoi se zhvillimet e fundit, përfshirë ngjarjet në Izrael dhe debatet parlamentare, tregojnë se kryeministri Rama po përballet me sfida të mëdha brenda vendit.