Kryeministri Edi Rama ka komentuar në nisje të podcastit “Flasim” protestën e fundit të opozitës, duke hedhur akuza të forta ndaj Partisë Demokratike për organizim të akteve të dhunshme gjatë tubimeve.

Rama tha se kishte kohë pa reaguar për protestat e opozitës, por se vendosi të flasë pas, sipas tij, “një përshkallëzimi të dhunshëm” dy javë më parë. “Kisha shumë kohë pa komentuar ndonjë protestë të opozitës. Deri kur dy javë më parë pas një përshkallëzimi të dhunshëm bëra një koment për të thënë diçka të vërtetë”, u shpreh ai.

Kryeministri deklaroi se në Europë ekzistojnë grupe të ndryshme protestuesish – nga anarkistë e ekstremistë, te tifozë huliganë – por shtoi se, sipas tij, “ka vetëm një parti në Europë që ka në programin e saj pjesë të pandarë ushtrimin e dhunës”, duke iu referuar Partisë Demokratike.

Ai pretendoi se gjatë protestave janë organizuar sulme ndaj institucioneve dhe është shkaktuar shkatërrim prone, ndërsa akuzoi opozitën për mobilizim të grupeve që i cilësoi si paramilitare. Sipas Ramës, në protesta janë përdorur molotovë dhe bomba artizanale, duke sjellë plagosjen e punonjësve të policisë.

“Mercenarët u shfaqën sërish dhe bënë më shumë dëm, duke kaluar në hedhjen e bombave artizanale… duke plagosur edhe më shumë punonjës të policisë”, deklaroi ai.

Në vijim të fjalës së tij, Rama përdori tone të ashpra ndaj drejtuesve të opozitës, duke e cilësuar situatën si “degjenerim të pandalshëm” dhe duke thënë se, sipas tij, protesta të tilla dëmtojnë imazhin e vendit në sytë e opinionit ndërkombëtar.

Deklaratat e kryeministrit vijnë në një klimë të tensionuar politike, ndërsa nga ana e opozitës pritet një reagim lidhur me akuzat e ngritura.