Pas nënshkrimit të marrëveshjes për organizimin e “World Law Congress Albania 2027”, Kryeministri Edi Rama deklaroi se Shqipëria nuk ka asnjë alternativë tjetër përveç anëtarësimit në Bashkimin Evropian.

Në fjalën e tij, Rama vlerësoi përparimet e bëra në reformën në drejtësi, duke theksuar se vendi ka bërë një pastrim të madh në këtë sektor dhe se tashmë gjyqësori nuk është më i kapur nga politika.

Drejtësia e re dhe modeli spanjoll

Duke iu referuar reformës në drejtësi, ai tha:

“S’kemi pasur kurrë shtet të së drejtës, nuk kemi pasur drejtësi të pavarur, sa kemi sot. Në rrekjen tonë për drejtësi, modeli spanjoll ka qenë burim frymëzimi. Politika është një luftë për pushtet dhe po kështu edhe një luftë për drejtësi.”

Ai shtoi se reforma në drejtësi ka larguar prokurorë dhe gjyqtarë të korruptuar dhe se tani sistemi gjyqësor është më i lirë nga ndikimi politik.

BE, e vetmja rrugë për Shqipërinë

Lidhur me mundësinë e ndonjë alternative tjetër për Shqipërinë përtej anëtarësimit në BE, Rama ishte i prerë:

“Shqipëria nuk ka plan B. Të kemi një plan B përkundrejt BE-së do të thotë të kemi një plan B përkundrejt lirisë dhe shtetit të së drejtës.”

Ai e mbylli fjalën e tij duke ftuar investitorët dhe turistët spanjollë të vizitojnë Shqipërinë, duke theksuar se verën e kaluar ka pasur një rritje të ndjeshme të vizitorëve nga Spanja, të cilët, sipas tij, “ishin tepër të lumtur që ishin në Shqipëri”.