Kryeministri Edi Rama ka reaguar ashpër ndaj kritikëve të qeverisë dhe reformës në drejtësi, duke i cilësuar debatet mediatike si “rrugaçëri” dhe “shpifje të ngritura në piedestal”. Ai theksoi se Partia Socialiste është e vetmja forcë politike në rajon që ka mbështetur reformën në drejtësi për pesë vite rresht, pa bërë asnjë lloj kompromisi.

“Në ato udhëkryqe të kanaleve të mbrëmjes, sfidoj këdo të gjejë një tjetër forcë politike në Evropën ish-Lindore që ka mbështetur reformën në drejtësi pa asnjë hezitim. Ne kemi lënë boshllëk në panoramën e zhvillimeve, por kurrsesi në mbështetjen e drejtësisë së re,” u shpreh Rama.

Lidhur me akuzat ndaj kryebashkiakut të Tiranës, Erion Veliaj, dhe bashkëshortes së tij për blerje luksoze me vlerë 980 mijë euro për fustane dhe bizhuteri, Rama i cilësoi si sulme të paargumentuara dhe të motivuara politikisht.

“Nëse Erioni dhe e shoqja kanë blerë 980 mijë euro fustane dhe bizhuteri, atëherë s’kemi çfarë diskutojmë. Por ne kemi të drejtën të kërkojmë prova dhe të themi që hedhja e kësaj shifre në mexhelis është e qëllimshme,” theksoi Rama.

Deklaratat e tij vijnë në një moment të tensionuar politik, ndërsa opozita dhe media kanë ngritur shqetësime për transparencën e funksionarëve publikë dhe për luftën kundër korrupsionit në vend.