Kryeministri Edi Rama ka komentuar burgosjen e ish-zyrtarëve socialistë, duke e cilësuar si një pasojë të reformës në drejtësi dhe jo një faj të Partisë Socialiste. Kreu i qeverisë deklaroi se pa PS-në, drejtësia nuk do të ishte çliruar nga ndikimi politik dhe nuk do të vepronte në mënyrë të pavarur.

“Si çdo pyll që ka derrat e vet, edhe PS ka njerëz që i përkasin drejtësisë dhe jo rrugës sonë”, theksoi Rama.

Ai argumentoi se për herë të parë në historinë e Shqipërisë, një reformë ka sjellë përballjen e zyrtarëve të lartë me drejtësinë në mënyrë të pavarur.

“Nuk ka ndodhur në historinë e shtetit shqiptar që nga viti 2012 deri kur bëmë reformën në drejtësi që të ketë qoftë edhe një të vetëm person të lidhur me pushtetin politik që të jetë vendosur para një drejtësie të pavarur. Kjo është një arritje historike e PS-së”, u shpreh kryeministri.

Sipas tij, fakti që Shqipëria është ulur në tryezën e negociatave me BE-në, është një tregues se korrupsioni është ulur. “Nëse do të kishte më shumë korrupsion, nuk do të ishim në këtë fazë të negociatave me Bashkimin Evropian”, përfundoi Rama.