Eduard Kuqi, i njohur për publikun si Edi, është kthyer sërish në arenën e lojës në Big Brother VIP Kosova, duke u bërë një nga rikthimet më të komentuara të këtij edicioni. Ish-banori i BBVK3 ka hyrë me një paralajmërim të fortë për rivalët e tij:

“Do të jem më i rrezikshëm.”

Rikthimi i Edi Kuqit vjen pas një sezoni ku ai u bë një prej figurave më të debatueshme. Në edicionin e kaluar, ai trazoi shtëpinë me energjinë, konfliktet dhe sjelljen e paparashikueshme – duke ndryshuar rrjedhën e lojës në disa momente kyçe.

Po aq i bujshëm sa hyrja e tij, ishte edhe largimi dramatik: gjatë një prime-i të ngarkuar emocionalisht, Edi kërkoi të braktiste menjëherë garën, duke deklaruar se ishte “i lodhur psiqikisht”. Ai madje paralajmëroi se, nëse nuk do i hapej dera, do të detyrohej ta thyente vetë. Prodhimi e lejoi të largohej menjëherë, dhe jashtë shtëpisë ai pranoi se ishte penduar për mënyrën se si u largua.

Në muajt që pasuan, Edi kërkoi disa herë rikthimin në format, madje shprehu dëshirën të ishte pjesë edhe e Big Brother VIP Albania. Megjithatë, ishte pikërisht Kosova që i dha atij shansin e dytë.

Tani mbetet për t’u parë nëse rikthimi i tij do të rikthejë shpërthimet e dikurshme, do të trazojë dinamikat e lojës, apo do të shohim një version të ri – dhe siç thotë ai vetë, më të rrezikshëm.