Situata mes Edon Zhegrovës dhe LOSC Lille është tensionuar ndjeshëm, ndërsa mesfushori kosovar ndodhet praktikisht jashtë planeve të klubit francez.

Sipas L’Équipe, Zhegrova, i cili iu bashkua Lille në janar të vitit 2022 dhe ka kontratë deri në vitin 2026, nuk është më pjesë e stërvitjeve të grupit dhe ka shprehur qartë dëshirën për t’u larguar. Problemet nisën pas një dëmtimi në muskujt aduktorë, i cili kërkoi ndërhyrje kirurgjikale dhe vonoi rikthimin e tij në fushë.

Megjithëse në fillim të vitit Napoli ofroi mbi 20 milionë euro, drejtuesit e Lille vendosën ta mbajnë, duke besuar në rikuperimin e tij. Klubi i ofroi edhe një zgjatje kontrate, por Zhegrova e refuzoi këtë propozim. Prej asaj kohe ai stërvitet veçmas dhe nuk është përfshirë më në ndeshje zyrtare.

Presidenti i klubit, Olivier Létang, ka vendosur se Zhegrova nuk do të largohet pa kompensim, duke kërkuar të paktën 20 milionë euro nga çdo transferim i mundshëm.

E ardhmja e lojtarit mbetet e pasigurt, ndërsa pritet që javët në vijim të jenë vendimtare për të ardhmen e tij në këtë merkato verore.