Deputeti dhe kryetari i Komisionit të Ekonomisë, Eduard Shalsi, ka shprehur nevojën për një opozitë të shëndetshme në Shqipëri, duke thënë se ky rol bëhet akoma më i rëndësishëm kur mungon një opozitë e tillë. Ai theksoi se mazhoranca ka mbështetur Strukturën e Posaçme Kundër Krimit dhe Korrupsionit (SPAK) dhe e ka ndihmuar që të ushtronte funksionet e saj.

Shalsi shtoi se SPAK është mbështetur nëpërmjet propozimeve dhe iniciativave të mazhorancës dhe se kjo ka qenë një arsye për ristrukturimin e sistemit të drejtësisë. Ai pohoi se është e rëndësishme që organet e drejtësisë të jenë të pavarura dhe të luajnë rolin e tyre. Shalsi gjithashtu u ndal në faktin që një krah i opozitës ka akuzuar kryetarin e SPAK për lidhje me një organizatë kriminale.

“Vendi ka nevojë për opozitë të shëndetshme. Në kohën kur mungon një gjë e tillë dhe nuk dihet sa kohë do të zgjasë, roli i Parlamentit bëhet akoma më i fuqishëm.

Unë besoj se kreu i SPAK-ut, jo me fjalë por me prova është mbështetur nga kjo mazhorancë. Kjo mazhorancë nuk e ka ndaluar mbështetjen për nevojat e SPAK-ut për të ushtruar funksionet e tij. Madje, kemi një krah që e akuzon për organizatë kriminale, ndërkohë që është edhe blloku ynë që e ka mbështetur”, u shpreh Shalsi.

Ai theksoi se kjo ka qenë edhe arsyeja që mazhoranca ndërmori iniciativën politike së bashku me aktorët e tjerë politikë në vend për të ristrukturuar sistemin e drejtësisë.

“Kjo na shtyu që të mbështesnim jo thjesht ristrukturimin e sistemit të drejtësisë por ngritjen nga e para të një sistemi që shqiptarët kishin aq nevojë. Besoj se z. Dumani e ka fare të qartë se ku synon kjo inciativë. Z. Dumani e di mirë se sa shumë mbështetje ka marrë nga kjo mazhorancë dhe ne duam që organet e drejtësisë të jenë të pavarura dhe të luajnë rolin e tyre”, tha Shalsi.