Tirana – Moderatoren dhe këngëtaren Egli Tako, e njohur për prezencën e saj në ekran, nuk e ka ndalur më durimi ndaj mediave online që sipas saj kanë shpifur për të. Në një intervistë në emisionin “Wake Up”, Tako tregoi se një ditë më parë ka bërë kallëzim penal kundër një portali që publikoi lajme të rreme dhe tituj mashtrues për figurën e saj.

“Janë të rralla momentet kur ndihem keq që jetoj në Shqipëri, por shpifjet e disa mediave e kalojnë çdo limit”, tha Tako, duke shtuar se shpifjet prekin jo vetëm figurën e saj, por edhe familjarët dhe të afërmit. Ajo theksoi se deri më tani ka toleruar, por pas kësaj ngjarjeje, do të ndjekë çdo hap ligjor për të mbrojtur moralin dhe reputacionin e saj.

Tako vuri në dukje se mediat online shpesh marrin peshë dhe ndikim, duke bërë që shpifjet të konsiderohen si të vërteta. “Dje është kaluar çdo lloj limiti që cenon moralin tim, karakterin dhe të drejtat e mia. Pa marrë parasysh se përfshihen edhe të afërmit e mi, kjo ishte hera e fundit që toleroj,” tha ajo.

Moderatoren e shqetësojnë veçanërisht titujt dhe artikujt që përdorin informacion të rremë për klikime, duke dëmtuar jo vetëm figurën e saj publike, por edhe jetën private. Pas kallëzimit penal, Egli Tako do të ndjekë procedurat ligjore në Gjykatën e Tiranës për çdo shkelje të ngjashme në të ardhmen.