Eksperti i sigurisë Milazim Gashi, gjatë një interviste televizive, ka deklaruar se qeveria e Albin Kurtit mban një pjesë të fajit për shpërthimin në kanalin e ujit të Ibër-Lepencit, për shkak të mungesës së masave të duhura mbrojtëse në asetet strategjike të Kosovës. Gashi theksoi se këto asete strategjike, veçanërisht ato që lidhen me Serbinë, duhet të ishin të pajisura me sisteme monitorimi satelitor për mbikëqyrje të vazhdueshme. Sipas tij, përdorimi i teknologjisë GPS satelitore për të monitoruar zonat strategjike si kanali Ibër-Lepenc dhe burimet e Ujmanit është një zgjidhje e realizueshme dhe me kosto të ulët.
“Është e papranueshme që një aset kaq i rëndësishëm të mos jetë nën mbikëqyrje 24/7. Kjo është një neglizhencë që ka hapur derën për sulme kriminale. Kontrolli satelitor në një rreze prej 50 kilometrash mund të kishte parandaluar këtë incident,” tha ai. Eksperti sugjeroi se me një vigjilencë të thjeshtë, autoritetet mund të kishin parandaluar sulmin dhe të kishin identifikuar grupet kriminale përpara aktit të kryer.
Gashi e konsideroi këtë sulm si një veprim hakmarrës nga grupe paraushtarake serbe, të motivuara nga tensionet para zgjedhjeve në veri të Kosovës. “Ky incident nuk lidhet me elementë rusë, por me grupe serbe të cilat janë të frustruara dhe kërkojnë të destabilizojnë rajonin,” deklaroi ai. Gjithashtu, ai vuri në dukje se këto grupe janë të mbështetura nga qarqe të caktuara brenda Serbisë dhe përbëjnë një pengesë për paqen dhe stabilitetin në rajon.
Milazim Gashi bëri thirrje për hetime të thelluara dhe për përforcimin e masave mbrojtëse ndaj aseteve strategjike. “Nëse këto ngjarje nuk hetohen deri në fund dhe nëse nuk ndërmerren masa mbrojtëse, situata do të përsëritet, duke vënë në rrezik stabilitetin e Kosovës,” përfundoi ai.
