Është zbardhur ekspertiza e ngjarjes që tronditi Oroshin pak ditë më parë, ku dy persona, Hamza Uka dhe Julian Cumraku, u ngujuan për orë të tëra brenda një banese, nga ku u qëllua me armë zjarri.

Sipas raportimeve nga ekspertët kriminalistë, në duart dhe rrobat e Hamza Ukës janë konstatuar mbetje baruti, ndërsa një plumb i qëlluar brenda banesës është fiksuar gjatë këqyrjes së vendit të ngjarjes, pas vetëdorëzimit të Ukës dhe Cumrakut.

Ndërkohë, rrethanat e plagosjes së Erzen Ukës, i cili pas dorëzimit u dërgua për mjekim në Spitalin Rajonal të Shkodrës me një plagë plumbi në këmbën e djathtë, ende nuk janë sqaruar nga Policia.

Autoritetet kanë sekuestruar kamerat e sigurisë në Bashkinë e Fushë-Arrëzit, ku janë filmuar Uka, Cumraku dhe një person i tretë, ende i paidentifikuar, i cili dyshohet se i ka ndihmuar. Po ashtu, në pyetje është marrë edhe vajza me të cilën ishte takuar Cumraku, por detaje të rrëfimit të saj nuk janë publikuar.

Prokuroria ka ngritur deri tani akuzën vetëm për armëmbajtje pa leje, ndërsa nuk ka ende informacion të qartë për qëllimin e qëndrimit të tyre në banesë. Në murin e objektit, ekspertët kanë konstatuar edhe një flamur të ISIS-it, duke shtuar dyshimet për lidhje me ideologji ekstremiste dhe qëndrimin aty prej disa javësh.

Ngjarja mbetet nën hetim intensiv, ndërkohë që Policia po përpiqet të sqarojë rolin e të gjithë personave të përfshirë.