Një variant i ri i Sars-CoV-2, nënvarianti i Omicron, po përhapet aktualisht në Europë, SHBA dhe Azi, dhe është ndër nëntipet që po monitorohen me kujdes nga Organizata Botërore e Shëndetësisë (OBSH). Megjithatë, në Shqipëri nuk është identifikuar ende asnjë rast i këtij nëntipi, ndërsa rastet e përgjithshme me Covid-19 mbeten sporadike dhe të lehta.

Silva Bino, shefe e Departamentit të Sëmundjeve Infektive në Institutin e Shëndetit Publik, deklaroi se “në këtë periudhë nuk kemi rritje të infeksioneve respiratore, pasi po i monitorojmë me kujdes. Mbi 90% e testeve të kryera rezultojnë negative”.

Ky mutacion i ri i Covid-19 përhapet lehtë dhe manifestohet me simptoma të zakonshme si dhimbje fyti, kollë e thatë, lodhje, temperaturë, dhimbje muskujsh dhe shqetësime gastrointestinale, por nuk ka shkaktuar forma të rënda të sëmundjes. “Nuk është për t’u shqetësuar. Nuk kemi identifikuar asnjë rast me këtë variant në vendin tonë, por jemi duke e monitoruar situatën”, shtoi Bino.

Ekspertja thekson se megjithëse Covid-19 nuk është larguar, nuk ka arsye për panik, por vetëm për kujdes të vazhdueshëm. “Duhet të vazhdojmë të respektojmë masat bazë të mbrojtjes, pasi virusi është ende prezent”, përfundoi ajo.

—