Një 34-vjeçar dhe një 43-vjeçar, të shpallur në kërkim ndërkombëtar nga autoritetet shqiptare, janë ekstraduar ditën e sotme në Shqipëri. 34-vjeçari Abedin Bacja, i dënuar me 5 vjet burgim nga Gjykata e Durrësit për veprën penale “Heqja e paligjshme e lirisë”, është ndaluar së bashku me dy shtetas të tjerë në vitin 2013, kur morën me forcë shtetasin A. Xh. në automjet.

Bacja dhe bashkëpuntorët e tij kishin kërcënuar babanë e shtetasit të kidnapuar për shumën prej 7500 eurosh, duke e kanosur për jetën e të birit. Autoritetet shqiptare kishin shpallur Abedin Bacja në kërkim ndërkombëtar për kryerjen e kësaj vepre penale.

Gjithashtu, nga Mbretëria e Bashkuar është ekstraduar 43-vjeçari R.M., i cili është i akuzuar për veprat penale “Dhuna në familje” dhe “Shkatërrimi i pronës”. Gjykata e Matit, në vitin 2021, i kishte caktuar masën e sigurisë “Arrest në burg” ndaj tij për ngjarjen ku kishte goditur me send të fortë (levë hekuri) kunatin e tij dhe kishte dëmtuar automjetin e tij.

Me ekstradimin e tyre, këta dy persona janë dorëzuar autoriteteve shqiptare për të përballuar përgjegjësinë penale për veprat e tyre dhe për të përfunduar procesin gjyqësor në Shqipëri.