Dritan, i njohur si Amar Shkëmbi, ish-anëtar i rrethit të ngushtë të Plaurent Dervishajt dhe i shpallur në kërkim nga SPAK për gati dy vite, pritet të ekstradohet sot nga Dubai drejt Aeroportit të Rinasit në Tiranë.

Shkëmbi akuzohet për vrasje të funksionarëve publikë të mbetur në tentativë, përfshirë prokurorin Arjan Ndoja, si dhe për vrasje në rrethana të tjera cilësuese me pasojë vdekjen e Andi Malokut dhe të Aleksandër Lahos alias “Rrumi”.

Sipas urdhër-arrestit të SPAK, Shkëmbi së bashku me disa persona të tjerë – përfshirë Plaurent Dervishajn, Julian Meçaj, Bledar Polovinën, Redjan Rrajën dhe Ariol Halilajn – kanë vepruar në vitin 2019 si pjesë e një grupi të strukturuar kriminal, duke kryer veprat penale të vjedhjes së bashkëpunuar, mbajtjes pa leje të armëve dhe vrasjeve të përmendura më lart.

Procesi gjyqësor ndaj Shkëmbit ishte pezulluar për një vit, për shkak të mungesës së tij dhe gjendjes së kërkimit ndërkombëtar. Me ardhjen e tij në Shqipëri, gjykimi do të riçelohet menjëherë, duke vijuar shqyrtimin e akuzave të rëndësishme ndaj tij.