Gjovalin Lesi, 56 vjeç, i dënuar me burgim të përjetshëm në Shqipëri, është ekstraduar nga Italia pas arrestimit të tij në prill të vitit 2024 në kuadër të operacionit ndërkombëtar të koduar “Verdikti”. Procedura e ekstradimit u finalizua falë koordinimit mes specialistëve të Interpol Tiranës dhe homologëve të tyre në Romë.

Sipas njoftimit të Policisë së Shtetit, Gjovalin Lesi, i lindur në Lezhë, është dënuar nga Gjykata e Mirditës në vitin 1998 me burgim të përjetshëm për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe municionit”.

Ngjarja për të cilën ai u dënua ndodhi në vitin 1997, në fshatin Rrasfik, Rubik. Pas një konflikti për motive të dobëta, Lesi vrau me armë zjarri kallashnikov motrën dhe bashkëshortin e saj.

Lesi u arrestua në Itali gjatë operacionit policor “Verdikti” dhe pas një procesi të gjatë bashkëpunimi mes autoriteteve shqiptare dhe italiane, është sjellë në Shqipëri për të vuajtur dënimin e tij të përjetshëm.

Policia e Shtetit deklaroi se ekstradimi i tij shënon një tjetër sukses në përpjekjet për të sjellë para drejtësisë të gjithë ata që përfshihen në krime të rënda, duke theksuar rëndësinë e bashkëpunimit ndërkombëtar për kapjen e të dënuarve të arratisur.