Situata e sigurisë në Ekuador vijon të përkeqësohet, teksa vendi është zhytur në një valë të fortë dhune dhe anarkie. Bandat kriminale nuk po kursejnë askënd, madje as figura të njohura të sportit. Së fundmi, mediat vendase raportojnë për një atentat të rëndë që i ka marrë jetën futbollistit të njohur Mario Pineida.

Futbollisti ekuadorian u qëllua për vdekje mbrëmjen e së mërkurës në qytetin port të Guayaquil, një nga zonat më të goditura nga krimi i organizuar. Lajmi u konfirmua zyrtarisht nga klubi i tij, Barcelona SC, përmes një postimi në platformën X (ish-Twitter).

“Me keqardhje të thellë njoftojmë zyrtarisht vdekjen e lojtarit tonë Mario Pineida, një ngjarje tragjike që ndodhi pas një sulmi të armatosur kundër tij në Guayaquil”, shkruan klubi në reagimin e tij.

Mario Pineida ishte 33 vjeç dhe konsiderohej një nga futbollistët më të njohur të brezit të tij. Ai ka qenë pjesë e kombëtares së Ekuadorit gjatë Kupave të Botës 2018 dhe 2022, ndërsa në karrierën e tij ka luajtur edhe për klubin brazilian Fluminense në vitin 2022.

Sipas informacioneve zyrtare, Pineida u sulmua nga dy persona që lëviznin me motoçikleta. Ata hapën zjarr ndaj futbollistit, nënës së tij dhe një gruaje tjetër që ndodhej me ta. Autoritetet nuk kanë dhënë ende detaje të plota mbi motivet e atentatit apo gjendjen e personave të tjerë të plagosur.

Ministria e Brendshme e Ekuadorit ka konfirmuar vdekjen e futbollistit dhe ka bërë me dije se një njësi speciale e policisë është ngarkuar për hetimin e ngjarjes, në përpjekje për të identifikuar dhe arrestuar autorët.

Ngjarja ka tronditur opinionin publik në Ekuador dhe ka rikthyer edhe një herë në vëmendje situatën alarmante të sigurisë në vend, ku dhuna e bandave kriminale po prek gjithnjë e më shumë edhe jetën publike dhe figurat e njohura.