Teksasi ka kryer ekzekutimin e parë me dënim kapital për vitin 2026. Charles Victor Thompson, 55 vjeç, u ekzekutua me injeksion vdekjeprurës në burgun e Huntsville, pas gati tre dekadash procese gjyqësore dhe apelesh.

Thompson ishte dënuar për vrasjen e ish-të dashurës së tij, Denise Hayslip, dhe partnerit të saj, Darren Keith Kane, një ngjarje e ndodhur më 1 maj 1998. Sipas dosjes gjyqësore, konflikti mes tyre kishte nisur një ditë më parë, ndërsa sulmi fatal ndodhi pranë banesës së viktimës.

Ai u dënua fillimisht me vdekje në vitin 1999, por vendimi u rrëzua në vitin 2001 nga Gjykata e Apelit, për shkak të shkeljeve kushtetuese në mbledhjen e provave nga prokuroria e Qarkut Harris. Pas rigjykimit, Thompson u shpall sërish fajtor dhe u dënua me vdekje në vitin 2005.

Pak ditë pas këtij vendimi, ai u arratis nga burgu duke përdorur dokumente identifikimi të rreme, por u arrestua pas tre ditësh në Luiziana.

Sipas të dhënave zyrtare, në Shtetet e Bashkuara u kryen 47 ekzekutime gjatë vitit 2025, numri më i lartë që nga viti 2009. Dënimi me vdekje vazhdon të zbatohet kryesisht në shtetet jugore, ndërsa 23 shtete amerikane e kanë shfuqizuar plotësisht dhe në disa të tjera është në fuqi një moratorium për zbatimin e tij.