Deputetja e Partisë Demokratike, Elda Hoti, ka publikuar sot një video në rrjetet sociale, ku shfaqet gjendja e rënduar e një rruge në një lagje të Bashkisë Kurbin. Në pamjet e shpërndara, rruga duket plot baltë dhe pothuajse e pakalueshme, si për këmbësorët, ashtu edhe për mjetet që nuk kanë aftësi të kalojnë terrene të vështira.

Hoti theksoi se kjo situatë e përditshme është pasojë e mungesës së shërbimeve nga njësia vendore, duke u shprehur se banorët janë të detyruar të jetojnë në kushte që nuk përputhen me asnjë standard minimal.

“Kjo është rutina e përditshme që përballen njerëzit me mos ekzistencën e Bashkisë Kurbin. Pasaporta europiane të cilën e premtoi Edi Rama.”, shkruan Hoti në postimin e saj.

Deputetja akuzoi institucionet lokale dhe qeverinë për neglizhencë, duke i bërë thirrje që t’i kthejnë sytë nga problematikat bazike të qytetarëve, të cilët—sipas saj—janë lënë në mëshirë të fatit.