Me një dekret të posaçëm të Presidentit të Ukrainës, Volodymyr Zelensky, kryetarja e Parlamentit të Shqipërisë, Elisa Spiropali, është dekoruar me titullin e lartë “Urdhri i Shën Olenës, Klasa e Parë”, një nga nderimet më të rëndësishme shtetërore të Ukrainës.

Ceremonia e dorëzimit u zhvillua në Tiranë, ku ambasadori i Ukrainës në Shqipëri, Volodymyr Shkurov, i përcolli Spiropalit dekoratën dhe nderimin në emër të presidentit ukrainas. “Në emër të Presidentit të Ukrainës, kam nderin të njoftoj se me Dekretin Nr. 617/2025, të datës 23 gusht 2025, me rastin e Ditës së Pavarësisë së Ukrainës, kryetarja e Parlamentit të Republikës së Shqipërisë, Elisa Spiropali, është dekoruar me Urdhrin e Shën Olenës, Klasa e Parë,” tha ambasadori.

Ky titull iu akordua Spiropalit për kontributin e saj në forcimin e marrëdhënieve mes Ukrainës dhe Shqipërisë, mbështetjen e palëkundur për sovranitetin dhe integritetin territorial të Ukrainës, angazhimin në veprimtari bamirësie dhe përpjekjet për promovimin e Ukrainës në arenën ndërkombëtare.

Ambasadori Shkurov theksoi se kjo dekoratë është “shenjë e mirënjohjes së thellë nga populli ukrainas për solidaritetin e Shqipërisë në momentet më të vështira” dhe e uroi Spiropalin për këtë vlerësim të merituar.