Kryetarja e Kuvendit, Elisa Spiropali, ka theksuar rëndësinë e zbatimit të vendimeve të Gjykatës Kushtetuese, duke e cilësuar këtë si një aspekt kyç për ruajtjen e ekuilibrave në sistemin demokratik të Shqipërisë. Këto deklarata vijnë pas reagimeve të forta nga përfaqësitë e BE-së dhe SHBA-së, që kanë kritikuar shpërfilljen e vendimit të Gjykatës për mandatin e deputetes Olta Xhaçka.

Në reagimin e saj, Spiropali bëri të qartë se e kishte ngritur këtë çështje si prioritet dhe se kërkon që Kuvendi të ndjekë dhe zbatojë vendimet e Gjykatës Kushtetuese. Ajo shtoi se votimi i fundit tregoi nevojën për një sqarim përfundimtar të vendimit të marrë një vit e gjysmë më parë, si dhe atij të korrikut 2024.

Për të zgjidhur këtë paqartësi, Spiropali ka kërkuar opinioni e Komisionit të Venecias, duke e konsideruar atë si një institucion me autoritet të padiskutueshëm. Kryeparlamentarja premtoi se sapo të merret ky opinion, Kuvendi do të veprojë menjëherë në përputhje me rekomandimet e Komisionit, pa vonesa të mëtejshme.