Elon Musk ka deklaruar se nëse do të ndërpriste shërbimin e internetit Starlink në Ukrainë, i gjithë fronti i luftës do të kolapsonte.

Në një postim në X, ai tha se Starlink është “shtylla kurrizore e ushtrisë ukrainase”, duke nënvizuar rëndësinë e madhe që ka ky sistem në komunikimet ushtarake të Kievit.

Sipas të dhënave zyrtare, rreth 42,000 terminale Starlink janë në përdorim nga ushtria, spitalet, bizneset dhe organizatat e ndihmës humanitare në Ukrainë.

Në shkurt, një burim i njohur për çështjen i tha Reuters se negociatorët amerikanë, që po diskutojnë për aksesin e SHBA në mineralet kritike të Ukrainës, kanë përmendur mundësinë e ndalimit të aksesit të Ukrainës në këtë shërbim.

Ndërkohë, Polonia, e cila financon përdorimin e Starlink për Ukrainën, ka paralajmëruar se mund të kërkojë një alternativë nëse kompania e Musk-it nuk shihet si një partner i besueshëm.