Këngëtarja e njohur shqiptare, Elsa Lila, sapo ka publikuar librin e saj të parë të titulluar *”Mirë se vini në Rebibbia”*, që sjell rrëfimin e saj të jetës në burg dhe vështirësitë e asaj kohe. Në një intervistë me gazetaren Rudina Xhunga, Elsa ndau detaje nga periudha e vështirë e kalimit në burgun italian dhe rrëfen përballjet me rreziqet dhe mbështetjen që gjeti atje.

Gjatë intervistës, Lila rrëfeu se gjatë kohës që ishte në qelinë e burgut, një grua tjetër kishte tentuar ta vriste. Ajo shpëtoi falë një vajze shqiptare që e kishte marrë në mbrojtje, duke i siguruar mbrojtje dhe akses tek një klan që kontrollonte pjesë të burgut. “Atje mund të ndodhë çdo gjë. Ka të dënuara me probleme të ekuilibrit mendor, që mund të të dëmtojnë pa një arsye të drejtpërdrejtë,” shprehet ajo.

Elsa tregoi gjithashtu se ndihmën dhe mbështetjen e mori edhe nga dy gardiane të burgut që i dhanë kurajo dhe forcë për të përballuar kohën e vështirë në 41bis, një regjim që kufizon komunikimin me jashtë. “Nuk kam pasur një jetë të thjeshtë,” shprehet Elsa. “Nuk vij nga një jetë përrallash. Kam pasur një jetë jashtë të zakonshmes.”

Arrestimi dhe Akuzat ndaj Elsës

Elsa Lila u arrestua në vitin 2022 pasi u dyshua për përfshirje në një organizatë kriminale që merrej me shpërndarjen e drogës në Romë. Mediat italiane raportuan se grupi, i përbërë nga 13 persona, përfshinte shqiptarë dhe italianë, ndërsa Lila dyshohej të ishte “financiere e grupit.” Në banesën e saj u gjet një bllok i zi ku, sipas raportimeve, ishin regjistruar të dhënat e lidhura me trafikun e kokainës.

Libri dhe intervista e saj paraqesin një anë të re të artistes shqiptare, e cila jo vetëm që rrëfen përvojën në burg, por edhe reflektimet për jetën dhe vështirësitë që ka përballuar në të kaluarën.