Mbrojtësi i Kombëtares shqiptare, Elseid Hysaj, pati një paraqitje të rëndësishme me Lazion në ndeshjen ndaj Cagliarit, ku dhuroi një asist për golin e avantazhit. Megjithatë, festa e tij nuk zgjati shumë, pasi u detyrua të largohej nga fusha për shkak të një dëmtimi në gjurin e majtë.

Titullar në këtë sfidë, Hysaj asistoi në minutat e fundit të pjesës së parë për Zaccagnin, i cili realizoi për 1-0. Por në fraksionin e dytë, pas një ndalimi të topit, mbrojtësi shqiptar ndjeu shqetësime dhe kërkoi menjëherë ndihmën e stafit mjekësor.

Mjekët e Lazios e ndihmuan të dilte nga fusha dhe i vendosën një fasho mbrojtëse, duke ngritur shqetësime mbi gjendjen e tij fizike. Ende nuk ka një vlerësim zyrtar mbi shkallën e dëmtimit, por ai rrezikon të mungojë në ndeshjet e ardhshme të Lazios në Serie A dhe Ligën e Europës.

Kjo është një goditje për Hysajn, i cili sapo kishte rifituar besimin e klubit dhe po rikthehej si një element kyç në formacionin bardhekaltër. Mbetet për t’u parë se sa serioz do të jetë ky dëmtim dhe sa kohë do t’i duhet për t’u rikuperuar.