Një 67-vjeçar nga Shkodra, Ndue Gjoka, u sëmur rëndë gjatë udhëtimit me traget në linjën Korfuz–Sarandë, teksa po kthehej për të festuar fundvitin me familjen.

Sipas burimeve mjekësore, Gjoka, i cili prej vitesh jeton si emigrant në Greqi, ka pësuar një problem serioz kardiovaskular, konkretisht disekacion të aortës, një gjendje e rrezikshme që kërkon ndërhyrje të specializuar.

Pas mbërritjes në portin e Sarandës, ai u dërgua menjëherë në Spitalin Rajonal të Sarandës, ku gjendja e tij u stabilizua përkohësisht. Më pas, për të marrë trajtim më të specializuar, 67-vjeçari u transportua me helikopter drejt një spitali në Tiranë.

Autoritetet shëndetësore dhe ekuipazhi i tragetit vepruan me shpejtësi, duke garantuar që pacienti të merrte kujdesin e nevojshëm pa vonesa.