Gjashtë emigrantë me origjinë nga Egjipti dhe dy nga Bangladeshi, që mbërritën mëngjesin e sotëm në Portin e Shëngjinit, tashmë kanë dalë nga qendra pritëse. Pas përfundimit të procedurave, ata po transportohen për t’u zhvendosur drejt kampit të Gjadrit. Deri më tani, ende nuk është konfirmuar nëse ka pasur emigrantë që janë kthyer drejt Italisë.

Emigrantët mbërritën nga vendi fqinj me anijen italiane “Libra” dhe u pritën në Portin e Shëngjinit me masa të rrepta sigurie. Anija italiane “Libra”, e cila përdoret nga Qeveria e Giorgia Melonit për të transferuar emigrantë në qendrat e diskutueshme të ndalimit në Shqipëri, ndodhet aktualisht në port. Sipas burimeve, kjo anije shërben për të pritur në det të hapur disa emigrantë, kryesisht burra të rritur dhe të shëndetshëm nga vende të konsideruara të sigurta, të cilët dërgohen fillimisht në qendrën e Shëngjinit dhe më pas në atë të Gjadrit, në bazë të një marrëveshjeje të nënshkruar me Shqipërinë.

Kjo strategji e Melonit u vu në zbatim për herë të parë më 16 tetor, por hasi në sfida: nga gjithsej 16 emigrantë nga Egjipti dhe Bangladeshi të transportuar atëherë, katër prej tyre duhej të ktheheshin menjëherë në Itali për shkak se ishin të mitur ose të konsideruar si “të cenueshëm”.