Teksa na ndajnë edhe pak më shumë se një orë nga nisja e seancës plenare, Endrit Shabani ka mbërritur në ambientet e Kuvendit të Shqipërisë. Gjatë seancës së sotme, ai pritet të bëjë betimin zyrtar si Avokat i Popullit.

Shabani do të zëvendësojë Erinda Ballancën, e cila prej tre vitesh ushtronte detyrën me mandat të përfunduar. Ai u zgjodh në këtë post më 11 dhjetor, pas një seance maratonë në Kuvend, duke marrë 85 vota pro, të mbështetura nga deputetët socialistë dhe socialdemokratë.

Kuvendi mban sot, në orën 10:00, seancën plenare të radhës, ku në rendin e ditës parashikohet shqyrtimi i një sërë projektligjesh, si dhe një mocion me debat lidhur me masat e ndërmarra nga qeveria në luftën kundër krimit të organizuar.

Betimi i Endrit Shabanit si Avokat i Popullit pritet të jetë një nga momentet kryesore të seancës së sotme parlamentare.