Tiranë – Avokati i ri i Popullit, z. Endrit Shabani, ka nisur sot ushtrimin e mandatit të tij, një ditë pas betimit përpara Kuvendit të Shqipërisë. Prezantimi zyrtar u zhvillua para komisionerëve, administratës dhe stafit të institucionit, nga Sekretari i Përgjithshëm i Kuvendit, z. Genci Gjonçaj, duke respektuar procedurat kushtetuese dhe duke siguruar vijimësinë institucionale.

Zgjedhja e Shabanit vjen në një moment të rëndësishëm për vendin, ndërsa Shqipëria ndodhet në fazën vendimtare të procesit të integrimit evropian, ku respektimi dhe garantimi i të drejtave të njeriut përbëjnë një standard qendror.

Institucioni vlerëson kontributin e Znj. Erinda Ballanca, e cila ka drejtuar për 8 vite Avokatinë e Popullit dhe ka siguruar stabilitet institucional dhe mbrojtje të vazhdueshme të të drejtave të qytetarëve, edhe pas mbarimit të mandatit kushtetues.

Duke i uruar Shabanit suksese në detyrën e re, institucioni shpreh gatishmërinë për një tranzicion korrekt, bashkëpunim të plotë dhe vijim të pandërprerë të misionit kushtetues për mbrojtjen e qytetarëve dhe të drejtave të tyre.

Ky moment shënon fillimin e një kapitulli të ri për Avokatinë e Popullit, me fokus mbi transparencën, përgjegjësinë dhe forcimin e besimit të publikut te institucionet e mbrojtjes së të drejtave të njeriut.