Enea Mihaj ishte një nga shtatë lojtarët që trajneri Silvinjo nuk aktivizoi në asnjë nga tre ndeshjet e EURO 2024 për Shqipërinë. Megjithatë, qendërmbrojtësi shprehu mirënjohjen e tij për mundësinë e pjesëmarrjes në këtë aktivitet përmes një reagimi në rrjetet sociale.

“Mbrëmë përfundoi rrugëtimi ynë në EURO 2024. Për fat të keq, nuk arritëm të kalojmë në raundin tjetër që ishte synimi ynë, pavarësisht vështirësive që kishte grupi. Personalisht, ndihem mirënjohës që pata mundësinë ta jetoj këtë përvojë, edhe nëse nuk arrita të kem minuta në fushë,” shkroi Mihaj.

Qendërmbrojtësi shprehu gjithashtu motivimin e tij për ndeshjet e ardhshme dhe mirënjohjen për tifozët që mbështetën ekipin. “Nuk po ju fsheh që tashmë po mendoj për ndeshjet e radhës dhe kjo më jep motivim. Më në fund dhe më e rëndësishmja, ne mund të mos kemi arritur aq larg sa kemi dashur, por ju, tifozët tanë, jeni fituesit e këtij kompeticioni. Ju u dëgjuat në gjithë Gjermaninë, na mbështetët me pjesëmarrjen tuaj të paparë,” përfundoi Mihaj në postimin e tij.