Babai i Martin Canit, Engjëll Cani, ka dhënë sot dëshminë e tij në Drejtorinë Vendore të Policisë së Tiranës lidhur me vrasjen e rëndë të djalit të tij 14-vjeçar. Gjatë seancës, ai ka marrë sendet personale të djalit, përfshirë çantën e shkollës, të cilat Martin Cani i kishte me vete ditën kur ndodhi tragjedia.

Engjëll Cani ka deklaruar se nuk ishte në dijeni për ndonjë konflikt që djali i tij mund të kishte patur me autorin e dyshuar, Mario Përlleshaj, katër ditë para ngjarjes. Ai ka theksuar se as nga shkolla dhe as nga institucionet nuk kishte marrë ndonjë informacion për këtë konflikt.

Po ashtu, Cani ka bërë me dije se asnjëherë nuk është kontaktuar nga familja e autorit pas ngjarjes tragjike, ndërsa bashkëshortja e tij ka marrë vetëm një telefonatë nga shkolla për të njoftuar ngjarjen. Përpjekjet e prindërve për të komunikuar me stafin e shkollës kanë qenë të pasuksesshme, sipas deklarimeve të tij.

Policia dhe Prokuroria e Tiranës po vazhdojnë hetimet për të zbardhur plotësisht rrethanat e kësaj ngjarjeje të rëndë.