Shqipëria feston një tjetër sukses të madh në peshëngritje. Talentja 17-vjeçare, Enkileda Carja, ka shkëlqyer në Kampionatin Europian për të rinjtë deri në 17 vjeç, që po zhvillohet në Madrid, duke u shpallur kampione e trefishtë e Europës dhe duke thyer pesë rekorde europiane gjatë garës.

Carja nisi fuqishëm në stilin e shkëputjes, duke vendosur rekord me 91 kg në provën e parë dhe e përmirësoi menjëherë me 93 kg në të dytën. Tentativa e tretë me 95 kg nuk rezultoi e suksesshme, por ishte e mjaftueshme për medaljen e parë të artë.

Në stilin e shtytjes, ajo tregoi edhe një herë formën e saj të jashtëzakonshme: ngriti 109 kg në provën e parë, vendosi një tjetër rekord europian, dhe e çoi më tej me 111 kg në të dytën. Pavarësisht se nuk ia doli me 114 kg në provën e tretë, rezultati i siguroi asaj fitoren absolute.

Me një total prej 204 kg, Enkileda Carja u shpall kampione e Europës në të treja kategoritë, duke lartësuar flamurin kuqezi në majën e podiumit në Madrid.

Ky rezultat konfirmon edhe një herë traditën e artë të peshëngritjes shqiptare, që vijon të prodhojë kampionë të rinj në arenën ndërkombëtare.