Pas vendimit të Gjykatës së Apelit për t’u dhënë vulën dhe logon Sali Berishës, deputetja e Partisë Demokratike në Fier, Eralda Tase Bano, e cila ishte pjesë e grupit të Bashës, ka vendosur të iu bashkohet PD-së zyrtare.
Në një reagim në rrjetet sociale, Bano shpreh bindjen se për të rikthyer shpresën në çdo vatër shqiptare, është e nevojshme të ketë një opozitë të fortë dhe të papërçarë. Vendimi i saj, tha ajo, nuk është i lehtë, por ajo do të mbetet deputete e PD-së.
Reagimi i Eralda Tase Bano:
“Të dashur qytetarë,
Lufta me veten është lufta më e vështirë dhe forma më sublime e rimëkëmbjes, luftë e cila është e domosdoshme dhe jetike. Kjo luftë do duhet të na forcojë e të na kthejë në modelin më të mirë të vetes.
Dëshiroj të shpreh përulësisht një mirënjohje të thellë për këdo që më ka mbështetur në këto vite!
Jam mirënjohëse ndaj miqve, kolegëve, simpatizantëve të mi dhe kujtdo që ka marrë guximin të më kritikojë. Jam e bindur që në ditë të vështira nevoja për të reflektuar mbi të ardhmen prevalon mbi çdo ideologji, bindje apo mendim.
Jam e vetëdijshme se rruga më e mirë për të rikthyer shpresën në çdo vatër shqiptare është që të kemi një opozitë të formuar, të papërçarë dhe të pathyeshme, sikundër jam e bindur që debati i brendshëm duhet të vazhdojë për të mirën e të gjithëve.
Vendimi im politik është i thjeshtë. Unë jam, dhe do të mbetem deputete e Partisë Demokratike të Shqipërisë.”
Bashkimi i Eralda Tase Bano me PD-në zyrtare vjen si një hap në përpjekjen për të forcuar opozitën dhe për të rikthyer besimin në institucionet politike.
