Presidenti turk Recep Tayyip Erdogan ka thënë sot gjatë një konference për media në Beograd, se është i kënaqur me marrëveshjen e arritur mes Kosovës dhe Serbisë sa i përket kalimit të kufijve me letërnjoftim.

Ai deklaroi se Turqia është shprehur e gatshme të ofrojë mbështetjen e saj në dialogun Kosovë-Serbi.

Duke folur për tensionet që ishin ngritur para dialogut mes Prishtinës dhe Beogradit, presidenti turk tha se Ankaraja zyrtare mbështet bisedimet dhe se i vjen mirë që janë ulur tensionet.

Ai para homologut serb, Aleksandar Vuçiç, theksoi edhe një herë qëndrimin e Turqisë sa i përket njohjes së Kosovës, duke thënë se është i kënaqur që Kosova dhe Serbia kanë arritur marrëveshje për letërnjoftimet.

“Jemi shumë të kënaqur me arritjen e marrëveshjes për kalimin e kufijve me letërnjoftim mes Kosovës dhe Serbisë. Sa i përket targave të automjeteve, shpresoj që do të arrihet marrëveshje në një të ardhme të afërt – si dhe për shumë çështje tjera”, shtoi Erdogan.