Nënkryetarja e Partisë së Lirisë, Erisa Xhixho, ka reaguar dje në protestën para SPAK, duke e quajtur arrestimin e Ilir Metës një “rrëmbim kriminal”. Sipas saj, ky veprim është një shkelje flagrante e drejtësisë dhe po vjen si rezultat i një sistemi që, sipas Xhixhos, vepron me dy standarde dhe persekuton liderët e opozitës.

“Drejtësia selektive me dy standarde, po persekuton liderët e opozitës, deputetë e opozitës. Kjo ndodh vetëm për një arsye, se opozita është vendosur ti qëndrojë përballë këtij regjimi,” tha Xhixho, duke theksuar se Partia e Lirisë ka kallëzuar në SPAK ministrin e Brendshëm, Policinë e Shtetit dhe Operacionalen për këtë veprim.

Ajo e cilësoi arrestimin si një “rrëmbim politik” që shkel Kushtetutën dhe Konventën Europiane të të Drejtave të Njeriut. Xhixho shtoi se do të ndjekin çështjen deri në Strasburg, duke e konsideruar këtë veprim si një akt të dëmshëm jo vetëm për Ilir Metën, por edhe për çdo qytetar të thjeshtë, i cili mund të jetë në të njëjtin rrezik për shkelje të drejtave të tij.

“Meta mbetet në izolim ekstrem pa fakte, pa prova dhe me zero akuza penale. Kur kjo ndodh me një personalitet si Meta, ish-president, imagjinoni se çfarë mund të ndodhë me qytetarin e thjeshtë të këtij vendi,” theksoi Xhixho.

Kjo deklaratë e saj është një tjetër reagim ndaj zhvillimeve politike të fundit, ku protesta dhe akuza ndaj autoriteteve janë shtuar në ditët e fundit.