Eksperti i kriminalistikës, Ervin Karamuço, ka hedhur një deklaratë të fortë mbrëmjen e sotme në një emision televiziv, duke zbuluar se një deputet i Kuvendit të Shqipërisë pritet të përballet me masa konkrete nga SPAK.

Sipas tij, organi i posaçëm i drejtësisë po heton mbi një bllok shënimesh, ku janë regjistruar në detaje ndarjet e parave të korrupsionit. Ky bllok, që sipas Karamuços ka një “vlerë të jashtëzakonshme hetimore”, është dorëzuar në SPAK nga një zonjë, e cila ka sjellë edhe informacione plotësuese.

“Di që së fundmi ka një hetim që po zhvillohet dhe mund të ketë masa konkrete ndaj një deputeti të Kuvendit të Shqipërisë. Në këtë bllok janë shënime ku deputeti ka caktuar persona të tjerë që të mbajnë evidencë se si ndahen paratë e korrupsionit, të cilat janë ngurtësuar në disa banesa në periferi të Tiranës”, tha Karamuço.

Eksperti shtoi se për momentin nuk mund të zbulojë as emrin e ligjvënësit dhe as forcën politike ku ai bën pjesë, por sipas tij, shumat e përmendura janë të konsiderueshme dhe të lidhura me prona e pasuri të fshehura.

Deklarata e Karamuços vjen në një moment kur SPAK ka rritur intensitetin e hetimeve ndaj zyrtarëve të nivelit të lartë, duke e bërë publikun të presë me interes se kush do të jetë deputeti që mund të përfundojë nën prangat e drejtësisë.