Demokrati Ervin Salianji, i cili po vuan dënimin me një vit burg në Fier, ka nisur një betejë ligjore për të sfiduar vendimin e Gjykatës së Apelit. Sipas burimeve, Salianji do të bëjë rekurs në Gjykatën e Lartë, duke kërkuar pezullimin e vendimit të Apelit që e dënoi. Kërkesa për rekurs është në përgatitje dhe pritet të dërgohet së shpejti.

Përveç kësaj, Salianji po përgatit gjithashtu një kallëzim për ta dorëzuar në SPAK kundër ish-ministrit të Brendshëm, Fatmir Xhafaj, duke vijuar kështu përpjekjet e tij ligjore edhe në këtë front.

Lidhur me postin e tij si deputet i Korçës, procesi formal për përfundimin e mandatit të Salianjit ende nuk është nisur në Kuvend. Kuvendi duhet të konstatojë përfundimin e mandatit dhe më pas njofton KQZ-në për të caktuar zëvendësuesin e tij, sipas listës shumë emërore të dorëzuar nga PD në zgjedhjet e vitit 2021.

Nga ana tjetër, Salianji ka deklaruar se do të vazhdojë të mbajë pozicionin e tij si drejtues politik i qarkut të Elbasanit edhe nga burgu, por për këtë çështje pritet një vendim nga strukturat e Partisë Demokratike.