Kreu i Prokurorisë së Posaçme, SPAK, Arben Kraja ka deklaruar sot se krimi shqiptar është i shtrirë nga Amerika Latine deri në Dubai. Deklarata e Krajës u bë në simpoziumin e organizuar për 30-vjetorin e marrëdhënieve të prokurorisë shqiptare dhe asaj italiane.
Kreu i SPAK tha se me Italinë janë 18 skuadra të përbashkëta hetimore. Sipas tij, grupet kriminale shqiptare, i ka cilësuar “të egra”, ndërsa u shpreh se është shtuar aktiviteti i drogës.
“Gjithmonë e më shumë krimi i organizuiar shqiptar po rrit aktivitetin e tij, po ndryshon përmbajtje e formë duke u përshtatur me mbijetesën për të eleminuar grupet e tjera e për të kapur tregjet. Karakteristikat e tij janë të vecanta nga disa pikëpamje.
Nga pikëpamja e shtrirjes gjithnjë e më shumë shohim grupe që shtrijnë aktivitetin duke nisur nga vendet e origjinës të Amerikës së Jugut ku fillon transporti i drogave të forta, në vende tranzit, në vende ku konsumohet në vendet e mëdha të BE por dhe në vende të tjera i është Dubai, për shumë arsye.
Një shtrirje e tillë tregon jo vetëm rrezikshmërinë por dhe forcën e aktivitetit kriminal. Tregues tjetër është egërsia e pasojave që sjellin. Shohim përditë vrasje të ndodhura në gjithë këto zona që përmenda qoftë të shtetasve shqiptarë por dhe të shtetasve të huaj.
Shohim gjithnjë e më shumë përdorimin e teknologjive të fundit digjitale për nevoja të aktivitetit kriminal, telefona të enkriptuar, rrjete të enkriptuara, sisteme digjitale që përdoren nga këto grupe kriminale. Shohim përdorimin e këtyre parave të fituara nga aktivitete kriminale për të rritur këtë aktivitet, për të korruptuar elementë që duan ta luftojnë si polici, prokurorë, e gjyqtarë e për të dëmtuar konkurencën e ndershme. Kjo shtrirje e gjerë që është kaq komplekse që përdor metoda të fudnit të teknologjisë kërkon kundërpërgjigje të fortë. “, tha Kraja.
“Ne duhet të flasim me punë konkrete, duhet të themi çfarë kemi bërë dhe çfarë kemi arritur dhe çfarë duhet të bëjmë më tepër. E menduam takimin ndryshe që të ftojmë studentë të drejtësisë, kandidatë për prokurorë, që t’i japim mundësi që të flasin edhe ata. Me rëndësi është që të shohim se çfarë duhet të diskutojmë”, u shpreh Kraja.
